उदयपुरमा कोरोनाको संक्रमण पुष्टि भएका २८ मध्ये १३ जनाको उपचार पछि पिसिआर रिपोर्ट नेगेटिभ आएको छ। वैशाख ५ गते संक्रमणको पुष्टि भएका १३ जनाको कोरोना अस्पताल विराटनगरको आईसोलेसनमा साढे दुई हप्ताको उपचार पछि गरिएको पिसिआर रिपोर्ट नेगेटिभ आएको हो ।
सुरुका १३ जनामा शुक्रबार र सोमबार गरिएको परिक्षण रिपोर्टमा कोरोना नेगेटिभ देखिएको जिल्ला स्वास्थ्य कार्यालय उदयपुुरका प्रमुख मोहन प्रसाद सुवेदीले जानकारी दिए । अव पुनः गरिने टेष्ट मा पनि नतिजा नेगेटिभ आए डिस्चार्ज गरिने सुबेदीले जानकारी दिए।
उदयपुरको त्रियुगा नगरपालिका ३ भुल्केको मस्जिदमा बस्दै आएका १ नेपाली सहित १२ भारतीयमा संक्रमण देखिएको थियो । उनीहरुपछि संक्रमण पुष्टि भएका थप १५ जना पनि कोरोना अस्पताल विराटनगरकै आईसोलेसमा उपचाररत छन् । पहिलो पटक संक्रमणको पुष्टि भएका १३ भन्दा पछि भेटिएका थप ८ संक्रमितको पनि आईसोलेसन बसाई १४ दिन पुगेकाले स्वाब परीक्षण गरिने सुबेदीले बताए।
संक्रमित बिरामीको हरेक १४ दिनमा स्वाब परीक्षण गर्ने गरिन्छ । यो परीक्षणमा पोजेटिभ रिपोर्ट आए थप १४ दिन उनीहरू अस्पताल बस्नुपर्ने हुन्छ भने नेगेटिभ रिपोर्ट आएमा लगातार दुई परीक्षण गरी डिस्चार्ज गरिन्छ ।
संक्रमितहरूमध्ये पहिलो चरणमा भर्ना भएका उदयपुरका १३ जनाको शुक्रबार स्वाबको नमुना संकलन गरी परीक्षण गरिएको थियो । सोमबार पुनः दोस्रो पटक परीक्षण गरिएको थियो जसमा दुवै रिपोर्ट नेगेटिभ आएको थियो । उनीहरुको अव दुई दिन पछि पुनः परीक्षण गरिनेछ।
