काठमाडौं : बाँकेको नेपालगञ्जका थप ७ जनामा कोरोना भाइरसको संक्रमण देखिए संगै नेपालगञ्जमा कोरोना संक्रमितको संख्या २३ पुगेको छ। भेरी अस्पतालमा पीसीआर परीक्षणका क्रममा थप ७ जनामा कोरोना पोजेटिभ देखिएको हो । गएराति गरिएको परीक्षणका क्रममा उनीहरुमा संक्रमण पुष्टि भएको हो ।
यसअघि नेपालगञ्जमा १६ जना कोरोना संक्रमितको पहिचानपछि उपचार भइरहेको छ । योसँगै नेपालमा कोरोना संक्रमित हुनेको संख्या ८२ पुगेको छ । संक्रमण पुष्टि हुनेमा चार महिला र तीन पुरुष रहेका छन् ।
नेपालगञ्ज महानगरपालिका ८ का २२, ३० र ४० वर्षका पुरुष तथा ९, ३२, ३४ र ५५ वर्षका महिलामा कोरोना पुष्टि भएको स्वास्थ्य मन्त्रालयले जनाएको छ । संक्रमित सबैको अवस्था सामान्य रहेको छ । उनीहरु चिकित्सकको निगरानीमा रहेका छन् ।
नेपालभर कोरोना संक्रमितको पुष्टि भएका ८२ मध्ये १६ जना उपचारपछि निको भएका छन् । कुल संक्रमितमध्ये प्रदेश नम्बर १ मा मात्रै ३१ जना छन । यसैगरी प्रदेश नम्बर ५ मा २४ र प्रदेश नम्बर २ मा १३ जनामा संक्रमण देखिएको छ ।
यस्तै बागमती प्रदेशमा ७ र सुदूरपश्चिममा ५ जनामा संक्रमण देखिएको छ । अहिले १ सय ६ जना संकास्पद विरामी आइसोलेसनमा उपचाररत रहेका छन् । देशभरी २१ हजार ५ सय २३ क्वारेन्टाइनमा रहेका छन् ।
हिजोसम्म पिसिआर विधिबाट १३ हजार ६ सय ४० जना नमुना परीक्षण भएको छ । आरडिटी विधिबाट ५० हजार ८ सय ४५ जनाको परीक्षण भएको छ ।
