विराटनगर । बैशाख ५ गते उदयपुरको भुल्केमा कोरोना भाइरसको पोजेटिभ भेटिएपछि विराटनगरमा उपचार गराइरहेका ६ जना भारतीय नागरिक निको भएर डिस्चार्ज भएका छन् ।
उनीहरुमा गरिएको तीनवटा परीक्षणमा कोरोना भाइरस संक्रमण नदेखिएपछि बुधबार बिहान डिस्चार्ज गरिएको हो । अस्पताल परिसरमा प्रदेश १ का सामाजिक विकास मन्त्री जीवन घिमिरेले विदाइ गरेका थिए।
एक पटक कोरोनाको संक्रमण भएर निको भएर फर्किएका हरुलाई पनि पुन: संक्रमण देखिएकोले डिस्चार्ज भए पनि उनीहरुलाई विराटनगर -१४ काे रानी मर्कजमा राखिने काेशी अस्पताल विराटनगरकी मेडिकल सुपरिटेन्डेन्ट डाक्टर संगीता मिश्रले बताइन् ।
उदयपुरको त्रियुगा नगरपालिका भुल्केस्थित मस्जिदमा बसेका १ नेपाली सहित १२ भारतीय जमातीलाई कोरोना संक्रमण पुष्टि भएको थियो । उनीहरुमध्ये ६ जना निको भएर डिस्चार्ज भएका हुन् । उनीहरुलाई फूलका गुच्छा दिएर विदाई गरिएको छ ।
विराटनगरको कोरोना विशेष अस्पतालमा उदयपुरमा संक्रमण पुष्टि भएका मात्र २८ जना र बाँकी ३ जनामध्ये दुईजना झापा र एक जना भोजपुरका छन् ।
