उदयपुर । उदयपुरको त्रियुगा नगरपालिकाले उद्योग, व्यावसाय, चालक, घरबहालसहित विभिन्न करमा छुट दिने घोषणा गरेको छ । कोरोना भाइरस (कोभिड १९) को कारण लकडाउनका कारण नगर क्षेत्र भित्र व्यावार व्यावसाय गर्नेहरुको लागी राहत पुगोस् भन्ने हेतुले छुट दिने घोषणा गरेको हो ।
त्रियुगा नगरपालिका ३ भुल्केका २८ जनामा संक्रमित भेटिएपछि कोरोनाको केन्द्रबिन्दु बन्न पुगेपछि सिंगो नगरपालिका आतंकित हुन पुगेको भन्दै नगरक्षेत्रका उद्योगी, व्यापार, व्यवसायी र अटो, टेम्पो चालकलाई कर छुट दिने निर्णय गरेको जनाइएको छ ।
चैत्र, बैशाख, जेठ र असारसम्मको घरबहाल कर, नगरले लिने व्यावसाय करमा छुट दिने भएको छ । रिक्सा, अटो पार्कीङ शुल्कमा छुट दिने निर्णय गरेको नगरले जनाएको छ ।
त्यस्तै साना मझौला घरेलु उद्योग दर्ता, नविकरणमा ५० प्रतिशत छुट दिने नगरले निर्णय गरेको त्रियुगा नगरपालिकाका मेयर बलदेव चौधरीले बताए । नगर भित्रका घर धनीलाई लकडाउन भरिको घर भाडा नलिन समेत मेयर चौधरीले आग्रह गरेका छन्।
