काठमाडौं । प्रतिनिधि सभा विघटनको मुद्दामा सुनुवाइ गरिरहको सर्वोच्च अदातलको संवैधानिक इजलासका न्यायाधीशले कसैको भाषणले आफूहरू प्रभावित नहुने बताएका छन्।
बुधबारको सुनुवाइका क्रममा बहस गरेका रिट निवेदक कञ्चनकृष्ण न्यौपानेले प्रधानमन्त्रीले भाषणमा संसद पुनर्स्थापना हुन्छ भन्दै हिँडेको कुरा इजलासमा राखेका थिए।
‘यो इजलासमा विचाराधीन मुद्दा भएको बेला प्रधानमन्त्रीले पुनर्स्थापना को भाषण गर्नुले जनमानसमा कस्तो सन्देश जान्छ श्रीमान्?’ उनले भने।
उनको कुरा सुनेपछि एक न्यायाधीशले दुवैतिरबाट त्यस्ता भाषण भइरहेको बताए। ‘प्रधानमन्त्रीको भाषणले तपाईंलाई प्रभावित गर्छ?’ उनले सोधे। ‘हुन्न श्रीमान!,’ अधिवक्ता न्यौपानेले भने ।
त्यसपछि न्यायाधीश अनिल सिन्हाले भने, ‘त्यसो भए हामी पनि कसैको भाषणबाट प्रभावित हुन्नौं, ल तपाईं विषयवस्तुमै केन्द्रीत भएर बहस गर्नुहोस्।’
अधिवक्ता न्यौपानेले प्रधानमन्त्रीले आफू खुसी संविधानको व्याख्या गरे संविधानवाद नै सकिने बताए। प्रधानमन्त्री ओलीले मंगलबारमात्रै प्रतिनिधि सभा पुनर्स्थापना हुने भ्रममा नपर्ने आग्रह गरेका थिए।
आजको बहसमा आठ अधिवक्ताले रिट निवेदनको पक्षमा वकालत गरेका थिए। अधिवक्ताहरु चन्द्रकान्त ज्ञवाली, कृष्णप्रसाद भण्डारी, अनिता मानन्धर, नवराज पाण्डे, सुजन नेपाल, सुरेन्द्र विक्रम केसी, देवबहादुर महत र रिट निवेदक कञ्चनकृष्ण न्यौपानेले बहस गरेका हुन्।
