उदयपुर । उदयपुरमा शनिबार राति भिषण आगलागी भएको छ । त्रियुगा नगरपालिका १२ ग्रीनसिटी पार्टी प्यालेस दक्षिण तर्फ रहेको टिनको सटर भएको भुइँ तले घरमा राति १ बजे विद्युत सर्ट भएर आगलागी भएको हो ।
आगलागीबाट घरमा भएका सम्पूर्ण सामान जलेर नष्ट हुदा ८० लाख बढीको क्षति भएको प्रारम्भिक अनुमान गरिएको प्रहरीले जनाएको छ ।
त्रियुगा नगरपालका १२ का मदन साहको चार वटा सटरमा रहेको किराना पसलका सामानहरु जलेर नष्ट भएको छ । किराना पसलको सामान जल्दा अन्दाजी ४० लाखको क्षति भएको प्रहरीले जनाएको छ ।
सिरहा गोलबजार घर भई उक्त सटरमा स्टिकर पसल गर्ने जनक मगरको पसल जल्दा अन्दाजी ११ लाखको क्षति भएको छ ।
यस्तै त्रियुगा नगरपालिका ८ घर भई सोही ठाउँमा मोटर पार्टस संचालन गरेका सरोज रेग्मीको पसल जल्दा अन्दाजी २५ लाख बढीको क्षति भएको प्रहरीले जनाएको छ ।
जग्गा धनी बाबुराजा प्रजापतीको एक तले टिनले छाएको भुइँ घरको ६ वटा कोठामा क्षति भई अन्दाजी ८ लाख बढीको क्षति भएको प्रहरीले जनाएको छ ।
स्थानीय, नेपाल प्रहरी, सशस्त्र प्रहरी, त्रियुगा, चौदण्डीगढी नगरपालिका र रौतामाई गाउँपालिका गरी तीन वटा दमकलले आइतबार विहान ४ बजे आगो नियन्त्रणमा लिएको थियो । क्षतिको थप विवरण आउन बाँकी छ ।
