उदयपुर । हलेसी तुवाचुङ नगरपालिका १० का वडाध्यक्षले महिला कर्मचारीसँग काम गर्न असहज हुने भन्दै हाजिर नगराई पुरुष कर्मचारी माग गरेपछि विवादमा तानिएका छन् ।
वडा अध्यक्ष अर्जुन कुमार पुरीले मंगलबार प्रमुख प्रशासकीय अधिकृतलाई पत्र पठाउँदै वडा सचिव पुरुष नै व्यवस्था गरिदिन माग गरेको पत्र सामाजिक संजालमा बाहिरिए पछि व्यापक विवादमा परेका छन । पुरी नेकपा एमाले बाट निर्वाचित वडा अध्यक्ष हुन ।
नगरपालिकाले वडा नम्बर १० को सचिवका लागि सुशीला दाहाललाई पठाएको छ। तर, वडाध्यक्ष पुरीले दाहाललाई हाजिर गराएर काममा लगाउनुको सट्टा नगरपालिका समक्ष पुरुष वडा सचिव व्यवस्थाको माग गरेका छन।
“यो वडा भौगोलिक तथा जनसंख्याको हिसावले ठूलो रहेको साथै यस वडाको साविक ८ र ९ लाई लक्षित गरी हप्ताको एक दिन नवलपुरबाट सेवा प्रवाह गर्ने काम भइरहेको छ,” वडाको पत्रमा उल्लेख छ, “पञ्जीकरण र सामाजिक सुरक्षाभत्ता अनलाइन प्रणालीबाट प्रवाह भइरहेकाले कामको चाप बढी हुने र जनप्रतिनिधिहरू नयाँ भएको कारणले महिला वडा सचिवबाट कार्य गर्न असजिलो हुने भएकाले यस वडामा पुरुष कर्मचारीलाई नै वडा सचिव व्यवस्था गरीदिन हुन अनुरोध छ।”
हलेसी तुवाचुङ नगरपालिकामा समेत प्रमुख महिला बिमला राई रहेको अवस्थामा वडा अध्यक्ष बाट खुलेआम लैङ्गिक विभेद भएको भन्दै पुरीको ब्यापक आलोचना भएको छ ।
महिला कर्मचारीलाई अस्वीकार गरेको बारे जानकारी पाएको बताउँदै बिहीबार कार्यालय पुगेर छलफल गर्ने मेयर बिमला राईले जानकारी दिइन्। यही नगरपालिकाका वडा नं ५ र ७ मा पनि महिला कर्मचारी छन्।
