उदयपुर । उदयपुरका स्वतन्त्र तथा साना दलका उमेदवारहरुले निर्वाचन आचारसंहितालाई कडाईका साथ लागु गराउनु पर्नेमा जोड दिएका छन् ।
जिल्ला निर्वाचन कार्यालय उदयपुरले बिहीबार गाइघाटमा आयोजना गरेको निर्वाचन आचारसंहिता २०७९ सम्बन्धी अन्तरक्रिया कार्यक्रममा उनीहरुले देशका मुख्य र जिम्मेवार दलहरुले आचारसंहिता उल्लघन गर्ने गरेकाले गम्भीरता पूर्वक कार्यान्वयन गर्न माग गरेका हुन् ।
निर्वाचन आचारसंहितामा उल्लेख भएका ९० प्रतिशत नियमहरु उल्लघन हुने गरेको विभिन्न राजनैतिक दल तथा स्वतन्त्र उम्मेदवारहरुले बताएका छन् ।
कार्यक्रममा जिल्ला निर्वाचन कार्यालयका प्रमुख खेमराज कोइरालाले आगामी मंसीर ४ गते सम्पन्न हुने प्रतिनिधि तथा प्रदेश सभा निर्वाचनमा उम्मेदवार, दल लगायत सरोकारवाला पक्षले पालना गर्नुपर्ने आचारसंहितको बिषयमा जानकारी गराएका थिए।
उदयपुरका प्रमुख जिल्ला अधिकारी जनार्दन गौतमले निर्वाचन आचारसंहिता कडाईका साथ लागु गर्ने बताए । प्रमुख जिल्ला अधिकारी गौतमले निर्वाचन आचारसंहिता उल्लघन गर्ने दल र उम्मेदवार स्वयम सचेत हुने हो भने बिगतमा जस्तो अवस्था नआउने उल्लेख गरे।
कार्यक्रममा पत्रकार महासंघ उदयपुर शाखाका अध्यक्ष भरत खड्काले निर्वाचनको समयमा पत्रकार तथा संचार माध्यमको अनुगमनका लागि बनाईएको संयन्त्र खारेजी गर्नु पर्ने माग गरे । अध्यक्ष खड्काले पत्रकार तथा संचार माध्यमहरुलाई नियन्त्रण तथा नियमन गर्नका लागि प्रेस काउन्सील नेपाल रहेकाले सोहि निकायबाट अनुगमन हुनु पर्नेमा जोड दिए । अध्यक्ष खड्काले स्थानिय संचार माध्यमहरुले निर्वाचन आयोगले जारी गरेको आचारसंहिता कार्यान्वन गर्नका लागि पत्रकार महासंघ उदयपुरले सहयोग पु¥याउने बताए ।
